ہماری بستی میں ایک شخص فجر کی اذان دیتاہے اور اس کے بعد گھر گھر جاکر بآواز بلند سب کو جگاتا ہے،کیا یہ درست ہے ؟
جواب
اذان و اقامت کے دوران باقاعدہ کچھ الفاظ پکار کر ان کے ذریعہ لوگوں کو نماز کی جانب بلانا یہ درست نہیں ہے۔البتہ اگر اذان کے بعد کوئی شخص گھر گھر جاکر یا گلی محلے میں آواز دے کر لوگوں کو نماز کے لیے اٹھاتا ہے اور اس عمل کو اذان کا حصہ نہیں سمجھتا تو اس میں قباحت نہیں۔ البتہ یہ یاد رہے کہ رسول اللہ ﷺاور صحابہ کرام رضی اللہ عنہم کے زمانہ میں اذان کو ہی نما زکی اطلاع کے لیے کافی سمجھا جاتاتھا، اذان کے بعد نما زکے لیے باقاعدہ دوبارہ کوئی اطلاع نہیں دی جاتی تھی، اور آج کل مساجد میں لاؤڈ اسپیکر کے ہوتے ہوئے تقریباً ہر گھر میں اذان کی آواز پہنچ جاتی ہے، نیز مؤذن کی یہ ذمہ داری بھی نہیں کہ اذان کے بعد لوگوں کو نماز کے لیے بلاتا پھرے، اس لیے مذکورہ عمل کی عادت ڈالنا مناسب نہیں ہے۔
فتاوی رحیمیہ میں مفتی عبدالرحیم لاجپوری رحمہ اللہ اسی نوعیت کے ایک سوال کے جواب میں لکھتے ہیں :
’’(الجواب)اصل حکم یہی ہے کہ تثویب(اذان کے بعد اعلان) مکروہ ہے کہ اذان کافی ہے۔ اذان کے بعد اعلان کی ضرورت نہیں رہتی، بلکہ اس سے اذان کی اہمیت کم ہوجاتی ہے۔مگر افسوس کہ خدائی بلاوا ’’حی علی الصلاۃ ، حی علی الفلاح‘‘ کی مسلمان پروا نہیں کرتے؛ اس لیے بعض علماء نے غافلوں کی تنبیہ کے لیے اجازت دی ہے ۔ مجالس الا برار میں ہے ۔
’’ولظهور التواني في الأمور الدینیة استحسن المتأخرون التثویب بین الأذان والإقامة في الصلوات کلها سوی المغرب، وهذا العود إلی الإعلام بعد الإعلام بحسب ما تعارفه کل قوم لأنه مبالغة في الإعلام فلایحصل ذلك إلا بمایتعارفونه‘‘. (مجالس الأبرار، ص: ۲۸۷ مجلس: ۴۸)
کبیریمیں ہے:
’’واستحسن المتأ خرون التثویب وهو العود إلی الإعلام بعد الإعلام یحسب ما تعارفه کل قوم لظهور التواني في الأمور الدینیة‘‘. (ص: ۳۶۱) (نور الإیضاح ص ۶۲ باب الأذان)(الشامية ج ۱ ص ۳۶۱، ص۳۶۲ أیضاً)
بلاشبہ صبح کا وقت غفلت کا وقت ہے، غافلوں کو بیدار کرنے اور نماز باجماعت کا عادی بنانے کے لیے باہمت لوگ جگانے کے لیے نکلتے ہوں تو ان کو روکنے کی ضرورت نہیں ہے۔ جب تک ضرورت ہو، یہ عمل جاری رکھاجاسکتا ہے۔ مگر کام سلیقہ سے ہونا چاہیے۔ تماشا نہ بنا لیا جائے اور باعثِ ایذاء مسلمین نہ ہو ، مستورات اور معذورین، مکانوں میں نماز اور ذکر ﷲ میں مشغول ہوں تو ان کا لحاظ رکھا جائے۔ لوگوں کو چاہیے کہ غافلین میں اپنا شمار نہ کرائیں ۔ اورلوگوں کو اٹھانے کی زحمت سے بچائیں۔
فقط واﷲاعلم بالصواب ۲۷ جمادی الاخریٰ ۱۳۹۷ھ‘‘. (5/120)
(امدادالمفتین 2/69-کفایت المفتی 3/55-فتاوی رحیمیہ 5/121)
امدادالاحکام میں ہے :
’’ اذان میں تثویبِ مسنون تو یہ ہے کہ اذان فجر میں’’الصلاۃ خیرمن النوم‘‘ اضافہ کیاجائے، اور تثویبِ مبتدع ایک تو اذان میں ہے کہ ’’حی علیٰ خیرالعمل‘‘ اضافہ کیاجائے جیسا روافض کرتے ہیں، اور ایک مابین الاذان والاقامۃ ہے کہ موذن تھوڑی دیر میں’’الصلاۃ جامعۃ یا الصلاۃ رحمکم اللہ‘‘ پکارتا ہے، یہ دونوں بدعت ومکروہ ہیں، والأول أشد ابتداعاً وکراهةً". (1/433)
۔ فقط واللہ اعلماذان کے بعد دوبارہ لوگوں کو نماز کے لئے بلانا ”تثویب“ کہلاتا ہے اور تثویب شرعاً پسندیدہ نہیں ہے؛ اس لئے اگر کسی جگہ یہ رواج ہو کہ موٴذن اذان کے بعد دوبارہ لوگوں کو نماز کے لئے پکارتا ہے تو یہ رواج ناپسندیدہ اور قابل ترک ہے (دیکھیں: فتاوی دارالعلوم: ۲/۹۶، ط: مکتبہ دارالعلوم دیوبند)
