مرادآباد میں سرسید کاقائم کردہ اسکول منہدم کردیاگیا

 مرادآباد : سرسید احمد خان کے قائم کردہ اسکول کی قدیم عمارت کو مرادآباد بلدی حکام نے منہدم کردیا ہے ۔ سرسید احمد خاں نے علی گڑھ میں  مدرسہ العلوم  تعلیمی ادارہ قائم کرنے سے کافی قبل مرادآباد اور غازی پور میں اسکولس قائم کئے تھے ۔ اُن کی تعلیمی اور سماجی سرگرمیاں نمایاں طورپر 1857 ء کی بغاوت کے بعد شروع ہوئیں 1858 ء میں سرسید کو مرادآباد میں صدر الصدور مقرر کیا گیا تھا۔ اُنھوں نے وہاں ایک اسکول 1859 ء میں قائم کیا تھا ۔ اُسے سابقہ ریاستی حکومتوں نے ہیرٹیج بلڈنگ کی حیثیت سے محفوظ رکھا تھا لیکن موجودہ یوگی آدتیہ ناتھ زیرقیادت بی جے پی حکومت نے اسے چند روز قبل منہدم کردیا۔ یہ بلڈنگ تحصیل اسکول کے نام سے مشہور ہوئی تھی جس کا اب نام و نشان بھی مٹادیا گیا ہے ۔